Производителите на какао во Гана побараа од претседателот Џон Драмани Махама да не потпишува нов закон со кој се ограничува користењето на земјиштето под плантажите со какао сè додека земјоделците не бидат консултирани за неговите одредби.

Здружението на задруги на производители и трговци на какао во Гана соопшти дека ги поддржува мерките за заштита на плантажите, но повикува на преиспитување на одредени одредби и нивно подобро објаснување на земјоделците пред законот да стапи во сила.

Координаторот на здружението, Мозес Џан Асџиду, рече дека земјоделците се особено загрижени за земјиштето кое станало комерцијално непрофитабилно, како и за можноста да бидат гонети доколку го заменат какаото со други култури на такви површини.

„Се согласуваме дека дрвото треба да биде заштитено бидејќи тоа е изворот на нашето постоење, но постојат критични ситуации кога земјоделецот мора да ја исече заболената плантажа и да засади друга култура што ќе му донесе приход“, рече Асџиду.

Загриженоста на производителите се совпаѓа со забелешките на пратениците од опозициското малцинство, додека регулаторот на пазарот COCOBOD ги отфрли критиките.

Шефот за односи со јавноста на COCOBOD, Џером Сем, изјави за локалните медиуми дека забелешките на опозицијата се политички мотивирани и дека законот е подготвен да им помогне на производителите.

Законот за Одборот за какао во Гана од 2026 година беше усвоен од парламентот кон крајот на јули, а тој им дава на плантажите со какао статус на „заштитени“ и забранува нивна конверзија без одобрение од COCOBOD, освен во случаи на пресадување одобрено од одборот, според Ројтерс.

Прекршувањата на законот се предмет на парични казни и затвор до 20 години.

Целта на законот е да се спречи претворањето на земјиштето под какао во рудници и друго земјоделско земјиште, што придонесува за пад на производството на какао во Гана.

Делови од плантажите низ целата земја веќе се претворени во плантажи со гума или се предадени на рударски активности.

Гана и соседниот Брег на Слоновата Коска заедно произведуваат половина од какаото во светот.