Демократска Република Конго воведе итна забрана за извоз на концентрати од бакар и кобалт во обид да ги принуди рударските компании домашно да ги преработуваат суровините и да обезбедат поголема вредност од своите природни ресурси, според официјален владин декрет.

Откако агенцијата денес ја објави забраната, цената на бакарот на Лондонската берза за метали (LME) скокна за 1,8 проценти на 14.369,50 долари за тон, што е највисоко ниво од крајот на јануари, кога беше забележан историски рекорд од 14.527,50 долари, објави Ројтерс.

Забраната стапи на сила веднаш, со можност за доделување привремени едногодишни ослободувања во стратешки околности.

Конго е најголемиот светски производител на кобалт и еден од најважните извори на бакар, метал кој е клучен за енергетската транзиција, од електрични автомобили и батерии до обновлива енергија и енергетска инфраструктура.

Целта на владата во Киншаса е да го прекине моделот во кој суровите или полупреработените материјали се извезуваат во странство, додека поголемиот дел од додадената вредност се остварува во други земји.

Наместо да извезува концентрати, Конго сака да го поттикне производството на рафинирани метали во рамките на своите граници.

Аналитичарите веруваат дека непосредниот ефект од забраната можеби нема да биде драматичен, бидејќи поголемиот дел од бакарот на Конго се извезува во форма на рафинирани катоди, а не концентрати.

Во првиот квартал од 2026 година, африканската земја извезе околу 696.700 тони бакарни катоди, додека извозот на концентрат содржеше само околу 18.900 тони чист бакар.