Цените на нафтата денеска повторно се зголемија, а главните светски референтни типови се на пат да ја завршат неделата со значителен раст, по новото заострување на тензиите меѓу САД и Иран.

Цената на северноморската нафта Брент во утринското тргување се зголеми за 1,64 проценти, на 88,50 долари за барел. Американската лесна нафта поскапе за 1,92 проценти и достигна 82,81 долари за барел.

Растот следува откако САД предупредија дека поморската блокада на Иран би можела да трае неопределено време. Тоа повторно ги засили стравувањата од нарушување на снабдувањето со нафта од Блискиот Исток, особено преку Ормускиот Теснец, една од најважните светски рути за транспорт на енергенси. Пред почетокот на конфликтот низ теснецот минуваше околу една петтина од светската дневна понуда на нафта и течен природен гас.

Според „Волстрит журнал“, Брент и американската нафта се движат кон неделен раст од речиси 6 проценти, и покрај падот на цените во претходната трговска сесија.

Цените вчера се намалија за повеќе од 2 проценти поради очекувањата за послаба глобална побарувачка и големиот раст на американските резерви на сурова нафта. Американските залихи во претходната недела се зголемиле за 17,4 милиони барели, што е најголем неделен раст од јануари 2023 година.

Пазарот во моментов останува под силно влијание на геополитичките случувања, при што секоја нова закана за транспортот преку Ормускиот Теснец дополнително ја зголемува неизвесноста околу светското снабдување со нафта.