Владата на Брегот на Слоновата Коска објави дека научниците во земјата откриле органско ѓубриво против вирусот што го напаѓа растението какао, познат како какао вирус, кој предизвикува згуснување на стеблото на растението и може да уништи до 50 проценти од плодовите.

Во соопштението се наведува дека органското ѓубриво се нарекува „Витал Плус“ и дека е откриено по две децении истражувања и теренски експерименти предводени од професорот Мамаду Думбија на Универзитетот во Абиџан, објави Синхуа, пишува Танјуг.

Се нагласува дека органското ѓубриво против вирусот на какао е направено од природни органски материјали и дека ја намалува зависноста на Брегот на Слоновата Коска од увозот на слични производи.

Владата ги повика надлежните министерства да го зголемат производството на ова органско ѓубриво и да го забрзаат процесот на добивање лиценца за масовно производство.

Вирусот на какао доведува до значително намалување на производството на какао, а Брегот на Слоновата Коска е најголем светски производител во таа област.

Оваа вирусна болест за прв пат е идентификувана на плантажите со какао во Брегот на Слоновата Коска во 1940-тите, а постепено се проширила во речиси сите области каде што се одгледува какао во земјата.