Тензиите на источниот брег на Гренланд се зголемуваат во време кога Трамп повторно зборува за преземање на контролата врз оваа арктичка територија.

Имено, во јули, компанијата „Гренланд Енерџи“ испорача опрема за дупчење на брегот на Гренланд без потребната дозвола, поради што доби силно предупредување од локалните власти.

Само една недела пред планираниот почеток на работите, гренландската влада објави дека проектот се одложува бидејќи не можат да се завршат сите потребни регулаторни процедури.

Гренландските власти сметаат дека предвидениот период бил прекраток за сериозна проценка на влијанието на проектот врз животната средина и локалното население.

Дупчењето сè уште не е одобрено

Властите сега мора да одлучат дали да дозволат дупчење во заштитеното мочуриште, кое е дом на ретки птици и мошусни волови. Постоењето на локалните ловци зависи и од оваа област.

Доколку се издадат сите дозволи, дупчењето би можело да започне најрано во текот на зимата 2027 година.

Ова е во спротивност со претходните најави на Џеф Ландри, гувернер на Луизијана и претставник на Трамп за Гренланд, кој тврдеше дека производството на нафта би можело да започне за десет месеци.

По неговата посета на Гренланд, Ландри рече дека нафтата таму би можела да помогне во решавањето на енергетската криза. Роберт Прајс, извршен директор на Гренланд Енерџи, тврди дека нафта вредна околу трилион долари лежи под областа Џејмсон Ленд.

Компанија поврзана со кругот на Трамп

Гренланд Енерџи инсистира дека нејзиниот проект не е поврзан со плановите на Трамп да го преземе Гренланд, но компанијата има голем број врски со луѓе блиски до американската администрација.

Во проектот е вклучен и ТВ-водителот Фил Мекгроу, познат како д-р Фил, кој планира документарна серија за истражување на нафта во Гренланд. Во одборот на компанијата е вклучен и поранешен член на американската морнарица кој работи на проектот за противракетниот систем „Златна купола“.

Меѓу инвеститорите е милијардерот Кен Грифин, кој купи девет проценти од компанијата во април.

Инвеститорите очекуваа дека поддршката на Трамп би можела да ја зголеми вредноста на акциите на Гренланд Енерџи. Наместо тоа, акциите на компанијата паднаа за повеќе од една третина по објавата дека дупчењето се одложува, објави Index.hr.

Компанијата сега вели дека ќе го искористи времето за дополнителен развој на плановите и соработка со властите на Гренланд и локалните заедници.

foto printskrin youtube