Владата со издадена државна гаранција на седница на 4 август му одобри на јавното претпријатие „Државни патишта“ да се задолжи уште 40 милиони ерва кај Комерцијална банка и кај Халк банка преку синдициран кредит.

Овој пат целта на задолжувањето не е јасно дефинирана, а во одлуката пишува само „финансирање преземени обврски и рефинансирање на долгови“. За два месеци ова е трето големо задолжување на „Државни патишта“ кај домашните деловни банки. Парите треба да се повлечат од двете банки до крајот на годината.

Претходните задолжувања беа појасно дефинирани - на 3 јуни беше одобрено задолжување на „Државни патишта“ од 140 милиони евра кај Комерцијална банка, Халк банка, НЛБ банка и Стопанска банка за автопатите од проектот Коридор 8 и Коридор 10Д кој ги изведува „Бехтел и Енка“, додека еден ден потоа кај истите домашни банки следуваше дозвола за земање кредит од 176 милиони евра за финансирање на изградбата на автопатот Кичево - Охрид.. Инаку за прв пат за овие два проекти ЈПДП се задолжи кај домашни комерцијални банки - досега финансирањето за автопатите на „Бехтел и Енка“ одеше со средства директно преку државниот буџет, а Кичево - Охрид го кредитираше кинеската Ексим банка.

„Со оваа одлука Владата издава државна гаранција со која го гарантира навременото и целосно исполнување на вкупните обврски на Јавното претпријатие за државни патишта кон Комерцијална банка АД Скопје и Халк банка АД Скопје по основ на главен долг и камата по основ на одобрениот кредит кои произлегуваат од Договорот за синдициран кредит наменет за обезбедување на финансиски средства за финансирање на преземени обврски и рефинансирање на долговите настанати по основ на задолжување за финансирање на капитални проекти и инвестиции, во износ од 2.460.000.000 (две милијарди четиристотини и шеесет милиони) денари, со рок на отплата 8 (осум) години од датумот на склучување на договорот за кредит, во кој е вклучен грејс-период од 3 (три) години од датумот на склучување на договорот за кредит, краен рок на користење на кредитот e до 31.12.2026 година, договорна камата по каматна стапка во висина на референтната стапка, зголемена за каматна маржа од 1,55 процентни поени, годишно, декурзивно, но не помалку од 4,20% годишно, доколку Јавното претпријатие за државни патишта не ги исполнува и сервисира обврските од Договорот“, пишува во одлуката.

Пред две недели власта призна дека на „Државни патишта“ за прв пат ќе и бидат потребни и позајмици од подобростоечки претпријатија за да продолжи изградбата на автопатите. Потврдено беше дека позајмици ќе даваат Македонски навигации (М-НАВ), МЕПСО и АД Државна лотарија, но вкупната сума остана непозната.

– Не се само од МНАВ, таму имаме средства и од Лотарија, МЕПСО и сопствени средства на ЈПДП. Средствата ќе бидат искористени за враќање на кредит кон кинеската банка за автопатите и истите тие средства во август ќе бидат вратени на компаниите – рече тогаш премиерот Христијан Мицкоски во одговор на новинарко прашање.