Платата во Загреб е за 750 евра повисока отколку во Србија. 

Просечната нето плата во Загреб во мај изнесувала 1.758 евра, што е за 206 евра повеќе од просечната плата во Хрватска, објави денеска порталот Индекс, повикувајќи се на податоците на градскиот завод за статистика во Загреб.

Во исто време, ова е за околу 750 евра повеќе од просечната нето плата во Србија, според податоците на Заводот за статистика на Република Србија за истиот период.

Средната нето плата во Загреб била 1.500 евра, што значи дека половина од вработените примале помалку од таа сума, додека во Србија средната плата била 93.277 динари, или околу 795 евра.

Просечната нето плата во Србија во мај била 118.398 динари, или околу 1.009 евра, додека просечната бруто плата била 163.470 динари. Во истиот период, просечната плата во Белград била значително над националниот просек, а Стари град го презел водството со просек од 191.185 динари.

Во Загреб, просечната нето плата била за 6,4 проценти повисока отколку во мај минатата година, а просечната плата во Србија номинално се зголемила за 11,3 проценти во периодот јануари-мај во споредба со истиот период минатата година.

Највисоката просечна нето плата во Загреб, 2.598 евра, била исплатена во вадење сурова нафта и природен гас, а најниската, 1.019 евра, во производство на облека.