Неколку популарни плажи на црногорското приморје се затворени за капење откако анализите покажале дека квалитетот на морската вода не ги исполнува пропишаните стандарди. Надлежните служби поставиле црвени знамиња и им препорачале на туристите и локалните жители да не влегуваат во морето додека не бидат добиени нови резултати.

Забрана за капење е воведена на делови од плажата Жукотрлица во Шушањ, Бар, поточно на локациите „Жукотрлица 02“ и „Жукотрлица 03“, каде што било утврдено влошување на квалитетот на морската вода. Црвени знамиња се поставени и на делови од Словенска плажа и кај Плажата Пржно во Будва.

Проблемот се појавил откако кај Шушањ била забележана можна појава на отпадни води во морето. Граѓани пријавиле заматена вода и непријатен мирис, по што надлежните институции започнале дополнителни проверки.

Во меѓувреме, кај дел од туристите се појавила загриженост, особено кај родителите кои летуваат со мали деца. Според медиумските информации од Црна Гора, во амбулантите бил забележан зголемен број деца со слични симптоми, меѓу кои дијареја, повраќање, покачена температура и малаксаност.

Педијатрите предупредуваат дека во летниот период, особено при високи температури и евентуално загадување на водата, во плитките делови од морето може да се создадат услови за развој на бактерии кои претставуваат ризик за здравјето, особено кај најмалите.

Надлежните служби продолжуваат со следење на состојбата и земање нови примероци од морската вода. Забраната за капење ќе остане во сила сè додека анализите не покажат дека водата повторно е безбедна за капачите.

Туристите се повикуваат да ги почитуваат поставените предупредувања и црвените знамиња, за да се избегнат можни здравствени последици.