Туристи облечени во купаќи снимени како се качуваат во канбаранијата на црквата „Св. Никола“ во Маврово за да скокаат во езерот ја разбранува јавноста, откако видео и фотографии од нивната забава беа објавени на социјалните мрежи. 

Најголем дел од граѓаните се згрозени од фотографиите и видеата на кои се гледаат младите девојки како се искачуваат во камбанаријата на потопената црква „Св. Никола“ во Маврово, облечени во костими за капење, третирајќи го верскиот и културен споменик како реквизит за забава.

Дел од граѓаните и локалното население кои и самите биле сведоци и снимиле дел од нивните активности преку социјалните мрежи упатија јавен апел до Општина Маврово и Ростуше, Националниот парк, МВР и Комуналната инспекција, барајќи итна контрола и санкции за сквернавењето на духовниот простор.

Граѓаните истакнуваат дека сите туристи се добредојдени, но бараат задолжително почитување на кодексот на однесување и верските чувства.

- Поради качувањето по градбата, постои реален ризик од дополнително физичко оштетување на и онака нарушениот црковен објект. Се бара од градоначалникот, полицијата и инспекциските служби итно да излезат на терен, да утврдат дали има материјална штета и да ги казни сторителите - велат загрижените граѓани.

Реакциите содржат и барање за поставување јасни правила, предупредувачки табли и редовни патфоли со цел заштита на култниот мавровски храм.

Фото: Фејсбук