Фото: Фактор

Плажата во Стење некогаш важеше за едно од најубавите и најпосетуваните места на Преспанското Езеро. Во 2015 година таа беше уредена со песок и дополнителни содржини, а потоа привлече голем број домашни и странски туристи.  Денес, сликата што ја опишуваат мештаните е сосема поинаква.

Според реакцијата од жителите на Стење, плажата е запуштена, шеталиштето е обраснато, а дел од просторот морале да го расчистуваат самите мештани за посетителите воопшто да можат нормално да пристапат до водата и да се капат.

Посебен проблем, велат, е состојбата навечер. Уличното осветлување не функционира како што треба, па делови од плажата и шеталиштето остануваат во целосен мрак.

„Луѓето плаќаат улично осветлување, а навечер е мрак. Сакаат туристи, а денар немаат инвестирано“, велат локалните жители.

Контрастот е уште поголем ако се потсетиме дека Стење пред десетина години беше промовирано како современо уредена плажа со угостителски содржини и простор за одмор и рекреација. 

Денес, наместо нови содржини и инвестиции што би ги привлекле туристите, мештаните бараат барем основно одржување – чиста плажа, проодно шеталиште и осветлување.

А токму Стење е пример колку брзо едно туристичко место може да го загуби некогашниот сјај доколку инфраструктурата не се одржува и во него не се вложува континуирано.