Либан денеска во Рим почнува нов круг преговори со Израел со посредство на САД, наведувајќи дека работи на постепено повлекување на израелските сили од југот на земјата.

Рамковниот договор што двете земји го потпишаа кон крајот на јуни во рамките на шестиот круг преговори предвидува распоредување на либанската армија во „пилот-зоните“ евакуирани од Израел, кој сè уште окупира дел од јужен Либан, под услов да се разоружи проиранскиот Хезболах.

Италијанскиот министер за надворешни работи, Антонио Тајани, по разговорите со шефовите на либанската и израелската делегација, Симон Карам и Јехиел Лајтер, вчера ги повика двете страни „да продолжат да работат конструктивно и да дефинираат заеднички решенија“ за спроведување на рамковниот договор.

Според рамковниот договор, либанската армија почна со распоредување на своите сили на 21 јули во јужниот град Завтар ал-Гарбија, првата „пилот-зона“, и му одобри враќање на населението.

Либанскиот премиер Наваф Салам вчера на седница на кабинетот изјави дека се во тек напори кои треба да овозможат постигнување „посебни израелски повлекувања од либанската територија, кои би кулминирале со целосно повлекување“, пренесе министерот за информации Пол Моркос.

Соединетите Американски Држави потврдија дека седмиот круг преговори ќе се одржи во Рим од 4 до 6 август.

Според официјален претставник на Стејт департментот, дискусиите треба да се фокусираат на проширување на процесот на „пилот-зони“, решавање на преостанатите гранични прашања и развој на сеопфатен мировен и безбедносен договор меѓу двете земји, кои технички сè уште се во војна.

Американскиот амбасадор во Либан, Мишел Иса вчера повика на „одговорно“ спроведување на рамковниот договор: „Пребрзото движење би претставувало ризик да се загрозат токму оние цивили кои овој процес треба да ги заштити“, се наведува во соопштението за јавноста.

Двете страни мора да се договорат за „јасен и практичен механизам пред да преминат на следната фаза“, додаде тој.

Хезболах повеќепати го отфрли овој договор и постојано одбива да го положи оружјето, а не е одредена ни временска рамка за целосно повлекување на Израел.

Директните преговори со Израел ќе донесат само „срам и понижување“, изјави денеска лидерот на Хезболах, Наим Касем, обвинувајќи го либанскиот претседател дека поттикнува поделби во земјата наместо да делува како „арбитер“.

Шиитското движење го вовлече Либан во регионална војна со отворање оган врз Израел на 2 март во знак на поддршка за Техеран, што предизвика силни израелски воздушни напади и копнена офанзива. И додека од јуни насилството е намалено, Бејрут и понатаму известува за спорадични израелски напади и ги осудува бомбардирањата на југот од земјата.