Вистински парадокс се случува во германска Луфтханза, каде според најновите податоци приходите се зголемиле за 8%, но нето добивката се намалила за дури 88% и изнесува само 123 милиони евра.

Германската авиокомпанија Луфтханза денес објави дека нејзината прилагодена оперативна добивка (EBIT) во вториот квартал од 2026 година се намалила за дури 56% на годишно ниво на 383 милиони евра, а главните виновници за овој биланс се високите трошоци за гориво предизвикани од војната на Блискиот Исток и шестдневниот штрајк на пилотите во пролетта оваа година.

Луфтханза оствари приходи од 11,1 милијарди евра од април до јуни, што е за осум проценти повеќе отколку во истиот период минатата година, објавува Die Welt.

Нето добивката на Луфтханза, сепак, изнесува само 123 милиони евра, што е пад од 88 проценти во споредба со претходната година.

„Луфтханза“ обезбеди 80 проценти од своите потреби за гориво по фиксни цени, но порастот на цените на керозинот поради војната на Блискиот Исток ја чинеше компанијата дополнителни 750 милиони евра непланирани трошоци.

Дополнително, шестдневниот штрајк на пилотите во април одзеде уште 150 милиони евра од касата на германската авиокомпанија.

Оперативната маржа во вториот квартал од 2026 година беше 3,4 проценти, што значи дека „Луфтханза“ задржа околу 3,4 евра оперативен профит за секои 100 евра приходи.

За споредба, една година претходно, оперативната маржа на „Луфтханза“ беше околу 8,4 проценти, што укажува на значителен пад на профитабилноста.

Извршниот директор на „Луфтханза“, Карстен Шпор, го опиша изминатиот квартал како „исклучително тежок, обележан со кризи и геополитичка неизвесност“, но рече дека интересот на патниците останува висок.

„Глобалната побарувачка за патувања останува исклучително силна, особено во премиум сегментот и на линиите до Азија. Нашите инвестиции во нова опрема во кабината и дополнителни услуги почнуваат да се исплатуваат“, рече Шпор.

„Луфтханза“ ја намали својата прогноза за целата година поради послабите резултати и сега очекува оперативната добивка да биде во опсег од 1,7 до 2,2 милијарди евра, додека претходно се очекуваше дека ќе биде 2 милијарди евра.

Фото: Принтскрин/Икс