Четири лица, меѓу кои три деца, се повредени во сообраќајна несреќа што утрово се случила на магистралниот пат Гостивар–Кичево, во близина на каменоломот „Прогрес 98“.

Несреќата била пријавена околу 7:40 часот, а во судирот учествувале четири патнички возила и еден камион, информираат од СВР Тетово.

По незгодата, три малолетни лица и една жена кои се превезувале во едно од возилата се пожалиле на здравствени проблеми и биле пренесени во гостиварската болница, каде им била укажана медицинска помош.

Полициски екипи вршат увид на местото на несреќата, по што треба да бидат утврдени причините и околностите под кои дошло до судирот.

Поради увидот, сообраќајот на патниот правец кон Стража се одвива отежнато. Возилата се пропуштаат наизменично по една коловозна лента, а се создаваат и колони во двата правци.