Украинските сили ослободија 745 квадратни километри територија и 26 населени места на југоисточниот фронт. Ова го соопшти украинскиот претседател Володимир Зеленски.

„Украинските вооружени сили во текот на оваа година ослободија 745 квадратни километри окупирана територија и вратија под своја контрола 26 населени места на југоисточниот фронт“, соопшти Зеленски. 

Операцијата, која според него се одвива точно според планираното, е спроведена од страна на воздушно-десантните единици и дополнителни воени формации долж потег од 60 километри на спојот меѓу Дњепропетровската, Доњецката и Запоришката област.

Воените активности на украинските сили во изминатите месеци беа насочени кон зголемување на притисокот врз руските позиции долж фронтот со должина од 1.200 километри. Покрај директните судири на теренот, украинските единици изведуваат редовни напади врз руската логистичка и енергетска инфраструктура со цел да ги ослабат снабдувачките линии на противникот.

Зеленски истакна дека ослободувањето на 26-те населени места е резултат на добро координирана акција. На официјалните канали беше објавено и видео од Главниот штаб на украинската армија, снимено со беспилотни летала, на кое се гледа како војниците го подигаат украинското знаме во вратените населени места.

Независните воени аналитичари забележуваат дека динамиката на руското напредување значително забави на поголем дел од бојното поле, иако руските трупи сè уште вршат притисок и се обидуваат да се приближат кон клучните урбани центри во источната Доњецка област.